Atha saptadaśaḥ paṭalavisaraḥ
Technical Details
atha saptadaśaḥ paṭalavisaraḥ |
atha khalu bhagavān śākyamuniḥ sarvatathāgatavikurvitaṃ nāma samādhiṃ samāpadyate sma | samanantarasamāpannasya bhagavataḥ śākyamuneḥ ūrṇākośād raśmayo niścarati sma | nīlapītāvadātamāñjiṣṭhasphaṭikavarṇaḥ | sarvaṃ cedaṃ budhakṣetramavabhāsya, sarvalokadhātvantarāṇi cālokayitvā, sarvagrahanakṣatrāṃśca muhūrtamātreṇa jihmīkṛtyākṛṣṭavā| ākṛṣṭā ca svakasvakā sthānāni sanniyojya tat parṣanmaṇḍalaṃ buddhādhiṣṭhānenākṛṣya ca, tatraiva bhagavataḥ śākyamunerūrṇākośāntardhīyate sma | sarvaṃ ca grahanakṣatratārakāḥ jyotiṣoruparudhyamānā ārtā bhītā bhagavantaṃ śākyamuniṃ prajagmuḥ | kṛtāñjalayaśca tasthure prakampayamānā muhurmuhuśca dharaṇitale prapatanamānāḥ ||
atha bhagavān śākyamuniḥ sarveṣāṃ grahanakṣatratārakājyotiṣāṇāṃ ca bāliśopajanitabuddhīnāṃ ca dehināmanugrahārthaṃ vācamudīrayate sma | śṛṇvantu bhavanto mārṣāḥ ! devasaṅghā samānuṣāḥ ! karma eva sattvānāṃ vibhajate lokavaicitryam | yaśca budhānāṃ bhagavatāṃ vajrakāyaśarīratāmabhiniṣpattiryaśca sasurāsurasya lokasya bhramatsaṃsārāṭavīkāntārapraviṣṭasya lokasya vicitraśarīratāmabhiniṣpattiḥ sarvedaṃ karmajaṃ śubhāśubhaṃ nibandhanam | na tatra kartā kārakaḥ īśvaraḥ pradhāno vā puruṣā sāṅkhyāpasṛṣṭo vā pravartate kiñcid varjayitvā tu karmajaṃ sarvakarmapratyayajanito hetumapekṣate | sa ca hetupratyayamapekṣate | evaṃ pratītyasamutpattipratyayānto'nyamupaśliṣyate śleṣmāṇāṃ ca bhūtābhiniṣpattimahābhūtāṃ janayate | te ca mahābhūtā skandhāntaramanādigatikāt pratipadyante | prapannāśca gatideśāntaraṃ vistaravibhāgaśo'bhyupapadyante | kālāntaroparodhavilomatājñānavahnimīritā karmoparacitavāsanā aśeṣamapi nirdahante | tridhāyānasamatā niḥprapañcatāṃ samatinirharante | mahāyānadīrghakāloparacitakarma svakaṃ madhyakālapratyekakhaḍgināṃ svayambhu jñānaṃ pravartate | paraghoṣānupravṛttiśravaśrāvakānāṃ hrasvakālācirādhirājyaṃ tenātyapravṛttidharmāntaraṃ buddhireva pravartate bāliśānāṃ vimohitānām ||
atha ca punarvicitrakarmajanito'yaṃ lokasanniveśadeśaveṣoparataḥ śivaṃ nirjarasampadamaśokavirajakarmalokasiddhimapekṣate | vimalaṃ mārgavinirmuktamaṣṭāṅgopetasuśītalaṃ karma eva kurute karma nānyaṃ karmāpekṣate ||
karmākarmavinirmukto niḥprapañcaḥ sa tiṣṭhati |
tridhā yānapravṛttastu nānyaṃ śāntimajāyate ||
trividhaiva bhavenmantraṃ tridhā karma prakīrttitā |
trividhaḥ phalaniṣpattistrividhaiva vicāraṇā ||
viparītaṃ tridhā karma trividhaiva pradṛśyate |
kuśalaṃ tat trividhaṃ proktaṃ punastantre pradṛśyate ||
punareva vidhaṃ gotraṃ mantrāṇāmāspadaṃ śāntam |
śāntaṃ nirvāṇagotraṃ tu buddhānāṃ śuddhamānasām ||
tadeva karma pratyaṃśaṃ mantrāṅge prakīrtitaḥ |
jyotiṣāṅgaṃ tathā loke sidhihetoḥ prakalpitam ||
tadeva aṃśaṃ karmaṃ vai pratyayāṃśe pravartate |
yathā hi śālī vrīhīṇāmaṅkureṇa vibhāvyate ||
tathā hi siddhadravyāṇāṃ lakṣaṇena vibhāvyate |
yathā hi śuklo varṇastu vyavahāreṇa prakalpyate ||
tathāhi jyotiṣayuktīnāṃ vyavahārthaṃ prakalpyate |
sarvataḥ sarvayuktīnāṃ karma evaṃ praśaṃsitam ||
na tat karma vinā cihnaiḥ kvacid dehaḥ saṃsthitaḥ |
cihnaiśca caritaiścāpi jātakairgotramāśṛtaiḥ ||
vividhaiḥ śakunairnityaṃ tat karmaṃ copalabhyate |
na kvacid vigrahī karma antalīno'nyalakṣyate ||
jvaritaḥ sarvato janturvikāraiścopalakṣyate |
evaṃ dehe samāsṛtya karma dṛśyati dehinām ||
śubhāśubhaphalācihnajātakāstu prakīrttitāḥ |
vividhā śakunayaḥ sattvā vividhā karmamudbhavā ||
balakāla tathā yātrā vividhā prāṇināṃ rutā |
śubhāśubhaphalā + + + + + ++ ++ + + + sadā ||
siddhyasiddhinimittaṃ tu pratyayārthamavekṣate |
nimittaṃ caritaṃ cihnaṃ pratyayeti prakalpitam ||
tasmāt sarvaprayatnena pratyayaṃ tu apekṣate |
yajjāpinā satā mantre sidhihetorapekṣayet ||
karmasvakānyatāni avyaṅgāni lakṣayet |
alakṣitaṃ tu sarvaṃ vai vighrakarmaiḥ sudāruṇaiḥ ||
tasmāt sarvāṇyetāni aṅgānīti munervacaḥ |
sālendrarājaḥ sarvajño bodhimaṇḍe samāviśet ||
mantraṃ udīrayāmāsa sarvavighnapranāśanam |
duḥsvapnaṃ durnimitaṃ tu duḥsahaṃ ca vināśanam ||
tasya bodhigataṃ cittaṃ sarvajñasya mahātmane |
māreṇa duṣṭacittena kṛto vighno mahābhayoḥ ||
animittaṃ tena dṛṣṭaṃ vai tarormūle mahābhayam |
animittāt tasya jāyante anekākārabhīṣaṇāḥ ||
tasya puṇyabalādhānā cirakālābhilāṣiṇā |
tena mantravarṇa tasya balāsau bhagnāśau namuciṃstadā ||
ṛddhimanto mahāvīryā saṃvṛto'sau mahādyutiḥ |
tasya mantraprabhāvena lipse bodhimuttamām ||
sa eva vakṣyate mantraḥ durnimittopaghātanam |
duḥsvapnaṃ duḥsahaṃ caivaṃ duṣṭasattvanivāraṇam ||
śṛṇvantu devasaṅghā vai grahanakṣatrajyotiṣām |
mantrarāṭ bhāṣitaḥ pūrvaṃ śālendreṇa jinena vai |
nigrahārthaṃ ca duṣṭānāṃ grahanakṣatratārakām |
bhūtāṃ caiva sarveṣāṃ saumyacittāṃ prabodhanām ||
śṛṇvantu bhūtagaṇāḥ sarve ye kecit pṛthivīcarāḥ |
apadā bahupadā vāpi dvipadā vāpi catuḥpadā ||
sarve saṃkṣepataḥ sattvā ye kecit triṣu sthāvarāḥ |
namaḥ samantabuddhānāmapratihataśāsanānām ||
om kha kha khāhi khāhi | hum hum | jvala jvala| prajvala prajvala | tiṣṭha tiṣṭha | ṣṇīḥ phaṭ phaṭ svāhā |
eṣa buddhāddhyuṣito mantraḥ jvāloṣṇīṣeti prakīrtitaḥ |
yāni karmasahasrāṇi aśīti nava pañca ca ||
karoti vividhāṃ karmāṃ sarvamaṅgalasammataḥ |
duḥsvapnān durnimittāṃstu sakṛjjāpena nāśayet ||
karoti aparāṃ karmāṃ sarvamantreṣu svāminaḥ |
vaśitā sarvasattvānāṃ buddho'yaṃ prabhavo guruḥ ||
smaraṇādasya mantrasya sarve vighnāḥ praṇaśyire |
devātidevasambuddha ityuktvā munisattamaḥ ||
muhūrtaṃ tasthure tūṣṇīṃ yāvat kālamudīkṣayet |
tasthure devasaṅghāśca śuddhāvāsoparistadā ||
sarveṣāṃ devamukhyānāṃ nakṣatragrahatārakām |
samayaṃ jagmu te bhītā uṣṇīṣo mantrabhāṣitāḥ ||
tulyavīryo mahāvīrya uṣṇīṣākhyo mahāprabhāḥ |
śatapañcacatuṣkāṃ vā saptāṣṭā navatistathā ||
dviṣaṣṭi pañcasaptānyā uṣṇīṣendrāḥ prakīrtitāḥ |
etat saṅkhyamasaṅkhyeyā rājāno mūrdhajā śubhā ||
teṣa tulyo ayaṃ mantraḥ jinamūrdhajajā iti ||
āryamañjuśriyamūlakalpād bodhisattvapiṭakāvataṃsakāt
mahāyānavaipulyasūtrāt pañcadaśamaḥ
karmasvakapratyayapaṭalavisaraḥ parisamāpta iti |